Ostirala, 2012ko otsailak 24a.
Sestao eta Gros berdinduta daude
sailkapenean, 19,5 punturekin, lehen sei jardunaldiak jokatuta.
Josu Tornay. Donostia.
Espero baino parekatuagoa ari da izaten
aurten Euskal Xake Liga. Lehen sei jardunaldiak jokatuta, Naturgas Sestao eta
Gros, titulua irabazteko bi faboritoak, berdinduta daude sailkapenean. Euskal
Herriko bi talde onenek 19,5 puntu dituzte, eta norgehiagoka guztietan nagusitu
dira. Hala ere, azpimarratzekoa izan da talde apalek handien aurka eman duten
maila. Sei txandetan bakarrik hirutan lortu dituzte puntu guztiak Sestaok eta
Grosek: lehen txandan biek, eta laugarrengoan bizkaitarrek. Horrez gain,
hirutan irabazi dute gutxieneko emaitzagatik (2,5-1,5): Sestaok, San Viator eta
Easoren aurka; eta Grosek, Ruta de Europaren kontra. Berdinketa hori bihar
hauts daiteke, Sestaon (Bizkaia), bi oilarren arteko lehian. Zazpigarren
jardunaldia jokatuta, bi txanda baino gehiago ez dira geratuko, eta ustez,
Grosek egutegi apur bat hobeagoa du.
Jokalari zerrendei dagokienez, Gros leial izan da bere oinarriekin, eta euskal
jokalariekin ari da jokatzen. Franco, Gonzalez, Etxegarai eta Argandoña izan
dira oinarria, eta soilik behin parte hartu dute Bauer frantziarrak eta
Hamdouchi marokoarrak. Sestaok, ordea, gehiago erabili ditu kanpotik ekarritako
jokalariak, eta lehian ari den euskal jokalari bakarra Mario Gomez
santurtziarra da.
Lehia
bizia jaitsiera saihesteko.
Sestao eta Gros alde batean utzita, Ruta de Europa ari da ondoen. Hirugarrena
da, eta oso litekeena da postu horretan amaitzea liga, jada lehen bi
sailkatuekin jokatu baitu. Ruta de Europaren atzetik daude Batalla, San Viator
eta Conteneo, lasai antzean. Hortik atzera, baina, lehia bizia dago jaisteko
postuak saihesteko. Aukera gutxien duena Altzaga Leioa da: sei puntu ditu, eta
bi berdinketa. Orvinak, Zuri-Baltzak eta Easok ere aukera asko dituzte
Leioarekin batera Lehen Mailara jaisteko. Maila horretan, Donibane da liderra,
Sestao B-ren aurretik. Hala ere, Kultur Sustapenak, Zornotzak eta Arrasatek
dute aukera gehien Donibanerekin batera mailaz igotzeko.